Tomchilab sug‘orish tizimining eng ahamiyatli afzalliklaridan biri ham suv berish va o‘g‘itlashning har ekinning talab-ehtiyojiga ko‘ra o‘z vaqtida, kerakli miqdorda amalga oshirilishiga imkon yaratilishi hisoblanadi. Paxta yetishtirishda ekin ma’lum bir bo‘yga yetgach, dala ichiga kirish imkoniyati cheklanganligi bois o‘g‘itlashni amalga oshirish qiyinlashadi, bu esa dehqon oldidagi eng mushkul muammolardan biri sanaladi. Bu jihatdan tomchilab sug‘orish orqali to‘g‘ridan-to‘g‘ri o‘simlikning ildiz sohasi oziqlantirilishi o‘g‘it isrofini kamaytirish bilan birga hosildorlikni maksimum darajaga ko‘tarishga ko‘maklashadi.